Aukin ásókn í skráningu vörumerkja á árinu 2025

Hugverkastofunni bárust á nýliðnu ári 809 umsóknir frá íslenskum aðilum um skráningu á vörumerkjum sem er 5% fjölgun frá árinu 2024 og ekki hafa fleiri umsóknir borist um skráningu frá íslenskum aðilum síðan árið 2018.

Smávægileg fjölgun varð einnig á umsóknum erlendra aðila um skráningu vörumerkja hér á landi en 552 slíkar umsóknir bárust á nýliðnu ári samanborið við 538 árið 2024. Á sama tíma fækkaði hins vegar lítillega alþjóðlegum umsóknum um skráningu vörumerkja sem óskað er eftir að taki gildi hér á landi í gegnum Alþjóðahugverkastofnunina (WIPO) úr 2.510 í 2.413.

Actavis, Ölgerðin og MS eiga flest skráð vörumerki

Alls eru tæplega 66.000 vörumerki skráð hér á landi. Flest eru þau í eigu bandarískra aðila, eða tæplega 13.000 en næstflest í eigu íslenskra aðila, ríflega 7.000. Flest skráð íslensk vörumerki eiga Actavis Group PCT ehf., Ölgerðin Egill Skallagrímsson og Mjólkursamsalan ehf. Flest erlend merki eru í eigu Apple Inc., Pfizer Inc. og Monster Energy Company.

18 andmæli gegn skráningu vörumerkja bárust Hugverkastofunni árið 2025 og úrskurðað var í 19 andmælamálum á árinu. 15 kröfur bárust um niðurfellingu vörumerkjaskráninga og ein ógildingarkrafa. Sex ákvarðanir voru birtar í niðurfellingarmálum og ein í ógildingarmáli.

Einkaleyfisumsóknum fækkar nokkuð

Hugverkastofunni bárust í fyrra alls 43 landsbundnar umsóknir um einkaleyfi, samanborið við 47 árið áður. Þar af voru 23 umsóknir frá íslenskum aðilum, 14 frá erlendum aðilum og sex umsóknir bárust í gegnum PCT kerfi Alþjóðahugverkastofnunarinnar.

Þó einkaleyfisumsóknum hafi fækkað lítillega fjölgaði veittum einkaleyfum á árinu en Hugverkastofan veitti í fyrra fimm innlendum aðilum einkaleyfi hér á landi á grunni landsbundinna umsókna og átta erlendum.

Flest einkaleyfi sem eru í gildi á Íslandi eru svokölluð evrópsk einkaleyfi sem veitt eru af Evrópsku einkaleyfastofunni (EPO) og hægt er að fá staðfest hér á landi. Nokkur fækkun varð á slíkum staðfestingum á síðasta ári þegar 927 evrópsk einkaleyfi voru staðfest hér á landi, samanborið við 1.073 árið áður.

Aðeins um 1% íslenskra einkaleyfa í eigu íslenskra aðila

Alls eru rétt ríflega 9.000 einkaleyfi í gildi hér á landi. Langflest, eða tæplega 3.300 eru í eigu bandarískra aðila en aðeins rétt ríflega 100 einkaleyfi hér á landi eru í eigu íslenskra aðila, eða um 1% þeirra einkaleyfa sem eru í gildi. Þau íslensku fyrirtæki sem eiga flest íslensk einkaleyfi í gildi eru Hampiðjan, Össur og Marel. Stærsti erlendi eigandi einkaleyfa hér á landi er International Business Machines Corporation (IBM) en af þeim aðilum sem eiga flest einkaleyfi á Íslandi eru aðeins þrír sem ekki eru lyfja- eða líftæknifyrirtæki.

1.500 hönnunarskráningar í gildi

204 umsóknir bárust Hugverkastofunni um skráningu hönnunar á árinu 2025. Þar af var mikill meirihluti, eða 163, alþjóðlegar umsóknir sem bárust í gegnum Alþjóðahugverkastofnunina. Íslenskir aðilar sendu inn 34 umsóknir sem er mesti fjöldi umsókna sem hefur borist undanfarin ár. Alls eru ríflega 1.500 hönnunarskráningar í gildi hér á landi, flestar í eigu svissneskra aðila en 86 í eigu íslenskra. 

Frekari tölfræði er að finna hér.